Mesh Wi-Fi 跟普通 Router 有乜分別？

 大家可能都聽過 Mesh Wi-Fi，到底同傳統 Router 有乜唔同？Mesh Wi-Fi（又會叫做 Wi-Fi System、Whole Home Wi-Fi 等等），就是用一套 Router 去取代原本的一部 Router，將 Mesh Wi-Fi 的不同分機，放在家居不同位置發放 Wi-Fi 訊號，從而解決單一 Router 覆蓋範圍不足的問題。

傳統 Router：覆蓋範圍有限，容易有 Wi-Fi 死角

傳統 Router 的覆蓋範圍有限，距離愈遠、障礙物愈多，Wi-Fi 自然收得愈差。假如家中有長走廊，尾房好大機會收唔到 Wi-Fi，就算收到就只得龜速，亦即係所謂的 Wi-Fi 死角。Mesh Wi-Fi 就由兩部或三部分機組成，可以靈活放在家中不同位置，例如客廳放一部、走廊放一部，而且整個網絡都係同一個 Wi-Fi SSID 名稱，解決 Wi-Fi 覆蓋死角問題。

假如家居面積不太大，沒有長走廊的話，單一 Router 應該足夠覆蓋整個家居。

假如家居面積較大，尤其是有長走廊，單一 Router 往往難以覆蓋整個家居，造成 Wi-Fi 死角。

Mesh Wi-Fi：加強覆蓋　維持高速

以前大家可能會用 Wi-Fi Extender，配合 Router 去加強覆蓋，但因為 Extender 係入 Wi-Fi、出 Wi-Fi，經 Extender 就會降速一半，而且 Extender 又會係另一個 Wi-Fi SSID 名稱，效果自然未夠理想。

Mesh Wi-Fi 雖然都係入 Wi-Fi、出 Wi-Fi，但三頻型號就會用其中一條頻譜做內部傳輸，所以經過分機都唔會明顯降速，加強覆蓋範圍之餘，仍能維持到相對高速度。如果大家屋企有走長廊，十分建議大家買 Mesh Wi-Fi 產品呢！

Mesh Wi-Fi 由兩部甚至三部分機組成，有效加強覆蓋範圍。

速度規格、雙頻、三頻 代表咩？

買 Router 第一樣要留意的，就是速度規格，亦即是 N300、AC1900、AX3000 之類。速度規格是由一組字母 + 一組數字組成，例如 AX3000 當中的 AX 就是代表 AX 制式（802.11AX，可以參考此文章），3000 就是 Wi-Fi 的總速度。點解是「總速度」呢？

雙頻譜、三頻譜 有乜用？

原來而家 Router 會提供兩組（甚至三組）頻譜，即係大家可能聽過的 2.4GHz 同 5GHz，3000 就是代表 3,000Mbps，代表 2.4GHz 及 5GHz 頻譜合共提供 3,000Mbps 速度（具體是 574Mbps @ 2.4GHz + 2,402Mbps @ 5GHz = 2,976Mbps）。其實一部裝置（手機或電腦）只會連線到一組頻譜（即係 2.4GHz 或 5GHz），所以要多部裝置同時連線到不同頻譜，才會用得盡 Router 的總速度。

三頻譜有乜用?

既然一部裝置用不盡 Router 的總速度，高階 Router 係咪冇用？咁又唔係！只要你家居有多過一部裝置會同時上網，只要分別連線到不同頻譜，就可以達到分流效果（部分 Router 會將所有頻譜合併為單一 Wi-Fi SSID 名稱，並自動分配不同裝置連到不同頻譜）。

N / AC / AX 制式、Wi-Fi 4 / 5/ 6 有乜分別？

大家可能聽過 N、AC、AX 等制式，又聽過 Wi-Fi 4、Wi-Fi 5、Wi-Fi 6 制式，到底實際所指是甚麼？原來 N / AC / AX 都是舊名字，Wi-Fi 聯盟在 2018 年推出新的命名方式，N 制式改名為 Wi-Fi 4，AC 改為為 Wi-Fi 5，AX 制式改名為 Wi-Fi 6……不知道大家覺得是否真的簡化了？

N 制式：早已落後

總之，N 制式（Wi-Fi 4）已經是十多年前的舊制式，主流速度是 300Mbps，最高速度只有 450Mbps，又只支援 2.4GHz 頻譜（跟藍牙、室內無線電話等共用，早已十分擠塞），今時今日實在沒有理由再買 N 制式的 Router 了。

AC 制式：目前主流

AC 制式（Wi-Fi 5）則是 2014 年推出的技術，原來都已經超過 5 年，所有 AC Router 都起碼是雙頻（Dual Band），即支援 2.4GHz 及 5GHz。當中 2.4GHz 頻譜依然是 N 制式，只有 5GHz 是支援 AC 制式，最高提供 1,733Mbps 速度。最主流的 AC Router 是 AC1900 速度，由 600Mbps @ 2.4GHz + 1,300Mbps @ 5GHz 組成。

AX 制式：最新一代，優先選用

AX 制式（Wi-Fi 6）是目前最新一代 Wi-Fi 制式，2.4GHz 與 5GHz 頻譜雙雙升級到 AX 新世代，2.4GHz 速度由 574Mbps 起跳，目前型號最高可達 1,148Mbps。5GHz 頻譜的速度更加強大，起跳速度已經有 1,201Mbps，高階型號更可去到 4,804Mbps 呢！而且 AX 制式的傳輸範圍有所提升，考慮購買新 Router 的話，大家應優先考慮 AX 制式呢！